[ مشكلة ] واحد نصب على واحد عن طريقى وبدون علمى

السلام عليكم ورحمة الله
من كام فتره فى خلال شهر10-2013 قمت بسحب مبلغ 94 دولار لشخص عبر حسابى فى الباى بال .. ولانى خبير فى الباى بال الحمد لله .. واتعاملت مع الراجل ده وناس غيره كتير .. فكنت مطمئن للتحويل .. وبعد 10-15 يوم وجدت الشخص اللى حول الفلوس رافع قضيه فى الباى بال وبيقول انه مستلمش حاجته ؟؟؟
والراجل اللى بعت الفلوس اختفى .. ولا بيفتح السكاى بى ولا الياهوو ولا مصدعنى بمكلماته زى الطبيعى بتاعه!!!
المهم كلمت الراجل المنصوب عليه وقالى ان الموضوع كان عبارة عن سكريبت تكلفته 250 دولار .. والراجل اللى نصب عليه خلاه يدفع 100 دولار مقدم والباقى عند استلام السكريبت .. لكن طبعا ولا كان فى اسكريبت ولا بتنجان .. وحسب كلام المظلوم ( حتى الان ) ان الراجل نصب عليه ومدلهوش السكريبت ولا اى حاجه وطنشه.



انا قلت يمكن لراجل ظروفه .. وبعتله على السكاى بى والياهوو انه يكلمنى ضرورى علشان يوضح الموضوع.
فوجئت بيه بيكلمنى امبارح وعايز ال 100 دولار بالرغم انهم وصلونى اصلا 94 دولا من غير عمولتى ولا اى حاجه خالص .. ياعنى عايز ينصب على انا كمان وخلاص.
ده بخلاف انه فى بدايت تعاملى معاه كذب على اكثر من مره .. بس كان كذب غير مضر .. ياعنى مثلا حاطط صورة لشخص ملتحى فى السكاى بى وهو اصلا غير ملتحى .. وعمال يحلف انه من السعوديه وفى الاخر طلع من المنصوره .. وكلام كتير كتير 70% منه مش حقيقى ولا واقعى.
ده بخلاف انى حاولت اعمل معاه عملية تحويل لشخص اخر لان وقتها مكنش معاى المبلغ المطلوب بالكامل .. وبدل ما انزل احط فى الفيزا .. قولت الراجل ده اولى لو معاه يكمل وخلاص.
واتفقنا وبعد الاتفاق لبسنى مع الراجل وطلع معهوش حاجه .. وكان عايز الراجل يحول الاول على حساب وسيط علشان الوسيط يبعتله المبلغ .. بالرغم انه قايل انه معاه المبلغ وزياده فى حسابه !!!!!
المهم من الاخر وخلاصة الكلام ... الرجال ده هايدخل موضوعى ويشوف كلامى .. لو ليه رد ياريت يرد علشان الموضوع يكون على العام .. لانى مش بخاف من حد + انى مش باكل حرام .. مش محتاج الحرام
وعلى العموم لو مردش وجاب ما يثبت ان الفلوس اللى اتحولتلى من حقه فعلا ودخل كتب حساباته بالكامل معاى علشان نخلصها .. يعتبر الفلوس رجعت لصاحبها اللى بيقول انه منصوب عليه.
لانى مش هشارك فى عمليت نصب ولا اكون طرف فيها .. ولا هساعد حد ينصب على حد لانه مش هاينفعنى يوم القيامه.

لو حد ليه رئى ياريت يقوله .. ولو حد يعرف الشخص اللى انا اتكلمت عنه .. ويشهدله بالصدق او النصب ياريت يقول .. علشان مظلمش حد.







أكثر...